مستمعينا فى كل مكان صباح الخير اول برنامج فى العالم العربى عن المدونات وموقعهhttp://wakeup.to/computer
موسيقى
لو انت او انتى من اللى بقوا يعتمدوا على الكمبيوتر فى حياتهم ضرورى قبلتك او قبلتك بين وقت وآخر مشكله ....الكمبيوتر مثلا زرجن او زى ما بيقولوا هنج ....يعنى ما سمعش الكلام وتجمد ....او بقى يعمل حاجات غريبه ....وده طبعا لا قدر الله لو اصابه فيرس
مش احسن لوتقولى على طول ممكن يحلوا المشاكل دى ازاى لو صادفتهم ؟
طبعا طبعا ....امال انا جبت سيرة المشاكل ليه ....ومش انا اللى حقول ازاى المشاكل دى تتحل ....انما حنستعين بخبير كبير اوى ....خبير مش من هنا ....قصدى من هناك....ايوه برافو عليكم ....دولى
خبير فى ايه بالظبط ....لازم تقولى
فى الكمبيوتر والأنترنت والحاجات دى اللى بيسموها على بعضها كده تكنولوجيا المعلومات ....سيبنى بقى افكر فى كام سؤال اسالهملو لما نطلع على الهوى وهو معانا
موسيقى
قبل ما نكمل القصه لازم ننوه انها حصلت بالفعل ....يعنى واقعيه 100% ...شويه كده ونروح لأستديو التيلفزيون اللى حتقابل فيه المذيعه ضيفها خبير تكنولوجيا المعلومات الدولى وتوجهله اسئله تهم كل المتعاملين مع الكمبيوتر والأنترنت ....المذيعه على الكرسى ...كرسى عالى من غير ضهر وقدامها فوتيى مريح ....كل دى تعليمات المخرج ....والمخرج اهه دخل وفى ايده الضيف وشاور له ليجلس على الفوتى المريح ....اللمبه الحمرا نورت وبقى الأستديو على الهوا
اعزائى المشاهدين ودلوقتى نبدا لقاءنا اللى استنتوه لفتره طويله مع واحد من اهم خبراء الكمبيوتر مش فى بلدنا بس وانما فى العالم ....ساب كل اشغاله وارتباطاته واجتماعاته ومواعيده وكل ده تضحيه كبيره منه لأن وقته من دهب ....الناس دول مطلوبين جدا فى عصر الكمبيوتر والأنترنت ....متتصوروش اد ايه
اولا بنرحب بيك وبنشكرك على انك سيبت كل اعمالك وجيت لنا
مانا جى اشتغل سيادتك
طبعا طبعا ...احنا حنستغل وجودك معانا ونسالك عن الجديد فى عالم تكنولوجيا المعلومات ....كده بكلمات بسيطه يفهمها الأنسان العادى مش المتخصص ....اين وصلت ابحاث وابتكارات تكنولوجيا المعلومات الآن
ممكن اقول ايه بس ....وصلت لبعيد ولسه ياما حنشوف واللى يعيش يشوف اكتر
ما زلنا على الهواء ومعانا خبير تكنولوجيا المعلومات الدولى الكبير ....لو صادف وعندك جهاز هنج ...او سكت فجاه ....كمبيوتر ....تيلفزيون ...حاجه من دى....بتعمل ايه
لسه قبل ماآجى الصوت راح من التيلفزيون عندى فى البيت
طبعا دى بالنسبه لك مشكله بسيطه
ابسط مما تتصورى ...كان ساعتها فى تسجيل لأهداف فى مباراه لكرة القدم بتتذاع ....وكنت حتجنن لما الصوت وقف ...ولقيت نفسى بصرخ...وده وقته ....وكام كلمه كده منفعله مقدرش اقولها...الا وهب التيلفزيون نطق تانى
(بقرف) نطق من الزعيق؟
ما هو لو ماكنش نطق كنت خبطه بعزم ما فى ....
(بقرف) وتفتكر ده هو الحل؟
امال اعمل ايه ....قولى لى انت
انا للأسف مش خبيره فى التكنولوجيا زي حضرتك ....عموما فى سؤال بيجلنا كتير عن الفيروسات التى تصيب الكمبيوتر وتعوقه عن ادائه لعمله بشكل طبيعى ...وطبعا المشاهدين بيسالوا دلوقتى ليه بتصيب الفيروسات دى اجهزتهم باستمرار
ده طبعا بيحصل لما الأجهزه ما تخدش التطعيم فى مواعيده
وبكده بينتهى لقاؤنا الشيق مع خبير تكنولوجيا المعلومات ...واللى اللقاء
موسيقى
حدث هذا اللقاء على الهواء فى تيلفزيون هيئة الأذاعه البريطانيه منذ ايام عندما ادخل المخرج الى استديو الهواء رجلا جاء ليجرى مقابلة لوظيفه بالهيئه على انه خبير تكنولوجيا المعلومات لشدة الشبه بينه وبين الخبير الحقيقى الذى وصل فى نفس اللحظه
وطبعا صاحبنا الذى وجهت له الأسئله ظن انها جزء من اختبار الوظيفه ....وقبل ما نختم نحذر من اتباع نصائح الخبير الدولى الغاليه
