تعرف ان العلم والمعرفه هى كل شىء

العلم نور طبعا

خد الخوخه مثلا هل تعلم انها كانت فى الأصل لمونه مره قبل ان تتنور

ياسلام

والا الأرنبيطه المزهزه ....الأرنبيطه دى كانت كرنبه   دبلانه بس ثقفت نفسها

فبقت ارنبيطه ؟ كلامك ده وراه حاجه

ده مش كلامى  دا كلام كاتب امريكانى ساخر مشهور اسمه مارك توين

بس وراه حاجه ....عاوزه تقولى ايه

يعنى اجيب من الآخر ؟

يبقى افضل

ما ينفعش

( باندهاش) ل-----يه

 ما انا  جيالك فى الكلام أهه

ليه بقى ما ينفعش تختصرى  وتجيبى من الآخر

لأن المسافه كبيره جدا بين الأرنبيطه والقمر الأصطناعى ....خصوصا لو كان قمر ذكى ....

وايه العلاقه بين سوق الخضار والأقمار الموجوده خارج الأرض علشان تبعت لنا برامج القنوات الفضائيه

اولا الأقمار دى مش كلها علشان تبعت لنا برامج القنوات الفضائيه ....فيه اقمار تانيه بتتابع ما يجرى على الأرض....لا مؤاخذه اقمار تجسس

 ده اولا وثانيا ؟

زى ما قال مارك توين ان اللمونه المره بقت خوخه لذيذه بعد ما شغلت مخهاعلماء الفضاء بعد ما شغلوا مخهم  توصلوا لفكرة الأقمار الذكيه

يعنى ايه ذكيه ....هى داخله امتحان الثانويه العامه

ما هو عشان كده لازم ابدا الحكايه من الأول مش من الآخر

بس باختصار

بقى ياسيدى فيه فيلم ....فيلم سينمائى مشهور جدا اسمه حرب النجوم ....فيلم قديم شويه ....بس موجود على اسطوانات سى دى ....يعنى ممكن نشوفها فى اى وقت على الكمبيوتر ...المهم

العالم ده وهو بالمناسبه فى جامعة ام اى تى المشهوره فى اميركا اجر الفيلم وقعد يتفرج عليه

زى اى حد فى وقت فراغه

لأ ....مش زى اى واحد ده خد الفيلم  ووراه للطلبه بتوعه .....وراهم بالتحديد شخصيه فى الفيلم وهى بتجرب تبعت فى الفضاء حاجه كده فى حجم كرة القدم ...بس ممكن تقدر توجه نفسها بالكمبيوتر جواها   للهدف ....اللى هو طبعا خارج الأرض ....ما هو الفيلم عن حرب فىالفضاء

يعنى الجديد انها بتقدر توجه نفسها

بالكمبيوتر اللى جواها وباجهزة استشعار

بس ده خيال فى فيلم

وقلب على ايد صاحبنا ده لجد ....قال لطلبته ....ازاى نحول الخيال ده لواقع ....يلا نفكر سوا

ووصلوا لحاجه

وصلوا لأقمار اصطناعيه ممكن توجه نفسها وكمان تنسق حركتها مع اقمار تانيه من نفس نوعها

وايه الفايده من ده كله

دلوقتى بقى  اقدر اجيب من الآخر واقولك اللى بتنفق على المشروع ده  ناسا اللى هى وكالة الفضاء وو حدة الأبحاث المتقدمه   فى البنتاجون ....يعنى وزارة الدفاع