هذه حلقه من اول برنامج اذاعى عن الأنترنت فى العالم العربى وموقعه هوhttp://dear.to/cairo حيث نقدم اعلام الغد من اليوم عندما تلتقى كل وسائل الأعلام فى مكان واحد هو شاشة الكمبيوتر

مستمعينا فى كل مكان صباح الخير

                                                      موسيقى

نصيحه لكل مقبل او مقبله على الزواج ....لأ متخفوش انا مش حتكلم عن التوافق فى الميول والأهداف ...و...و...والا الوقت ما يكفيش     انا عاوزه الفت النظر ومن واقع خبرتى لحاجه واحده ..  وانبه واقول     تاكد او تاكدى من موقف الطرف الآخر من الحاجه دى

موقفه او موقفها من ايه

حيكون مين غيرها يعنى واحنا برنامج عن الكمبيوتر وسنينه....قصدى الكمبيوتر بس من غير سنينه       هى طلعت كده           موقفه من  الأنترنت طبعا

ليه هى  الأنترنت ممكن تسبب مشاكل بينهم

ايوه طبعا... مش الأنترنت نفسها ولكن.....اقول لك  اسمع الحكايه اللى حقولها وانت تعرف كل حاجه

                                                      موسيقى

الحكايه مين ابطالها

دول  اتنين اتفقوا على الجواز وقاعدين كده يحلموا بعشهم الجميل والعصافير بتزقزق حواليه         والسعاده بترفرف عليه والدنيا مش سيعاهم وحيطيروا من الفرح طير ....وبصوت هادىء ولكنه مفعم بالصدق والأخلاص قال لها

صدقينى...لو اقدر اجيب لك الدنيا كلها مش كتير عليك

وانا ياحبيبى  مصدقاك

بس ياخساره العين بصيره والأيد قصيره

ولا يهمك انت عندى بالدنيا....وانا كمان مقدره ظروفك ....انا مش طالبه غير شبكه الماز ومهر زى صاحبتى نجلاء اللى طالعه فيها ما اعرفش على ايه الله يرحم وشقه بحرى برحه  ومدونه على ذوقى  

وايه على ذوقك

مدونه ...انت ما سمعتش عن المدونات على الأنترنت  

ايه المدونات دى كمان

على فكره دى ما بتتكلفش ولا مليم ....انا قلت حرام كفايه حيدفع فى الشبكه والمهر والشقه

وايه لازمتها

لأ بقى ....امال الناس وقرايبى واصحابى وحبابيبى ....وخالتى فى استراليا حتشوف صور فرحنا ازاى

ازاى

ححطها فى المدونه بتاعتى على الأنترنت وابعت لكل اصحابى وقرايبى عنوانها ....واللى يحب يشوفها من اى مكان يفتح المدونه ويشوفها ....مش فكره تجنن بذمتك

طيب لو كنت مابحبش كل من هب ودب يتفرج على الصوردى

بسيطه ....ممكن تخلى اللى يشوفها هم قرايبنا  ومعارفنا بس ....حنديهم رقم سرى يكتبوه مع عنوان المدونه ....واللى ما يعرفش الرقم ده ما يقدرش يفتحها ولايشوف حاجه

طيب ما تبعتى الصور بالبريد

صور الخطوبه والا كتب الكتاب والا الفرح؟ ....الصور كتير وانا ممكن اغيرها وقت مانا عاوزه فى المدونه بكل سهوله وببلاش ....فى دقيقه اغيرها وتبقى قدام زوار المدونه على الفور...شوف بقى لو بعتها بالبريد توصل حته زى استراليا بعد اد ايه ....وادفع كام ....ده اذا وصلت خالص

ايوه بس بالبريد ممكن يحتفظوا بالصور

ومن المدونه بردوا ممكن يحتفظوا بنسخ منها بمنتهى البساطه ....واهم من ده كله ....نفسى ابقى نجمه ....نجمه مشهوره

فى الغنا والا التمثيل والا فى ايه

ناس كتير حطوا اغانى المطرب او المطربه اللى بيحبوه او بيحبوها فى المدونه بتاعتهم واشتهروا ....كل عشاق المطرب او المطربه دى بقوا يتجمعوا فى المدونه ....يكتبوا تعليقاتهم وافكارهم ويتعرفوا على بعض ....وصاحب المدونه نفسه بيشتهر و  بيبقى نجم

نجم ايه

نجم من الباطن